“Ситим” медиа-бөлөх “Легенды Якутии” бырайыагынан өссө биир дьоһун кинигэ күн сирин көрдө. Ол курдук, биллиилээх композитор, Саха хомсомуолун бириэмийэтин лауреата, ССРС физическэй култуураҕа туйгуна, СӨ култууратын үтүөлээх үлэһитэ, СӨ норуодунай артыыһа, Мэҥэ Хаҥалас, Кэбээйи, Үөһээ Бүлүү, Амма улуустарын, Дьокуускай куорат уонна Саха Өрөспүүбүлүкэтин бочуоттаах гражданина, 60 тахса ырыа ааптара, Саха сирин кэрэ айылҕатын туһунан 18 киинэ ааптара, Арассыыйа Суруналыыстарын сойууһун чилиэнэ Аркадий Алексеев “Сүрэхтэр кэпсэтэр кэмнэрэ” диэн ырыанньыга күн сирин көрдө.
Ырыанньыкка саха биллиилээх самодеятельнай композитора уонна ырыаһыта Аркадий Михайлович араас сылларга суруйбут ырыалара: “Күһүҥҥү серенада”, “Ыйдаҥа түүн”, “Илиибин уунабын эйиэхэ”, “Мутукча сыта”, “Сибэккилэр”, “Саха үҥкүүтэ”, “Студент доҕорбор”, “Хайа, хаһан кэлэҕин”, “Таптыырга буруй суох” уо.д.а., уопсайа 63 ырыа киирдэ. Норуот билиниитин сүдү талаанынан, түбүктээх үлэтинэн, төрөөбүт дойдутугар, дьонугар-сэргэтигэр муҥура суох тапталынан ылыан ылар.
Бырайыак салайааччыта СӨ култууратын үтүөлээх үлэһитэ, норуот дьокутаата Мария Христофорова.
